2012年3月3日 星期六

富二代搵工

香港市面好像一片繁榮,其實經濟前景麻麻,不少企業都凍結人手,今年大學畢業搵工會較難。事實上未到暑假竇蓉已接到不少朋友來電,表示子侄今年畢業想搵工做,唔介意人工低,部份則想霸定intern空缺,難怪沒有父蔭的年輕人慨嘆機會愈來愈少,社會充滿怨氣

自從本地大學大開中門歡迎大陸學生後,好多大陸富二代為了居港,先報讀碩士課程,畢業後想辦法在香港搵工,這類富二代不一定來自上海、北京,廈門、福建、廣西、湖南度度都有,因為老家並非五光十色的大城市,更想留在香港。初出茅廬的新人,份糧根本難以應付衣食住行各項開支,但呢班富二代的父母甚至會在港置業,好等子女打風流工。年輕人出來工作,除了能力外,意志和鬥心都好重要,大陸學生英語基礎已較差,而富二代在完全無經濟壓力的情況下,學習能力和意欲更低,純粹為應酬客戶才會勉為其難請一、兩個。

Intern更加是俾面派對,由於暑期工貢獻不大,冇關係人士,連面試機會也沒有。直接些講,父母份CV才是關鍵,如果應徵者父母是公司大客,當然要招呼,返工前重要通知各同事,中午食飯,唔好餐餐大家樂,試下特色小店如蘭芳園、九記、蛇王芬之類,星期四、五就去SOHO食西餐,工作方面最好以活動統籌為主,可以見識大場面,但又不用對住部電腦就最好。

其實暑期工對年青人來說是一種考驗,由搵工、見工,到真正返工,學習如何鑑貌辨色,見識一下office的工作守則,兩、三個月下來,就真正體驗到何謂搵食艱難。不過今時今日,暑期工要考驗的不是年青的同學仔,而是竇蓉這些骨幹管理層,稍一不慎,隨時為咗暑期工呢件事中招。

去年朋友老細的寶貝女暑假從美國回港,想安插在竇蓉公司實習,本來學習點見工,從芸芸求職者當中表現自己是磨練的第一關,父母安排,後生仔怎會知道社會真實競爭幾激烈呢,不過朋友好似急需交差,位小朋友樣貌娟好,take多個冇所謂。誰不知位小公主第一日返工就告假!竇蓉公司每日都會發E-mail通知所有同事邊個告假,於是大家都好奇怪何解有人第一日返工就請假,無論老嫩、職位高低,第一日返工一定會想俾個好印象僱主和同事,早些瞓,早些出門口都唔算老土,至於唔返工就更加諗都冇諗過。

冇人期望暑假工會幫到手,但如果第一日上班就連人都唔見,會在公司傳遞一個負面訊息,公司的咩規因人而異,皇親國戚就咩到得,因此我決定叫HR同佢講,既然身體不好,多些休息唔好返工了。

竇蓉以為公主daddy同我地並無直接生意來往,憑咩未返工先請假呢?將機會留給其他真正想學嘢,或者想賺番數千蚊學費的普通青年,不是更好嗎?但過咗一日竇蓉就知衰,公主daddy打俾竇蓉老闆投訴,話寶貝女第一次俾人叫唔使返工,大受打擊,竇蓉就被狠批唔識做人,轉頭重要氹番公主返工,跟住交帶各位同事好好照顧公主。都怪自己太天真,既然賣人情就賣到底,何苦又忽然扮正義。為人父母者到底又點諗呢?子女長大了遲早要到社會鍛鍊,公主的父親亦不過是高級打工仔,難道這種有錢人欺壓普通人,轉頭又被更有錢的人欺壓,就是他們信奉的原則?

沒有留言:

張貼留言