中產換樓難

朋友剛剛添丁，湊夠一個「好」字，全家都好開心，不過一家四口加上菲傭、陪月，還有經常來幫手的外母，逼在一個七百呎單位，想搵空間抖啖氣都難。本來朋友同太太計劃女兒出世後就換樓，原有自置物業升值，一賣一買絕對負擔得起，點知政府一連串招數，打擊埋換樓用家，目前唯有一動不如一靜，暫時屈就再看情況。

正常市況下，已有樓在手的業主，如果想換樓，平賣平買、貴賣貴買都可以計數，最重要是市場有流通量。但政府一連串行政手段，扭曲了市場規律，令到市場缺乏成交。某些報章最鍾意大大隻字「劈價一成、兩成」，一來好多呢類筍盤經紀會益自己友，二來有時劈完其實只是市價低少少。在交投萎縮的情況下，自己住嗰層想賣就被人狂質，想買的心水盤一來未必遇到，遇到又唔會好似報紙咁講到咁平，分分鐘變成平賣貴買，咁就的確冤枉。再者，市場流通量不足，好難做到新舊樓交吉順利對接，一家有大有細，到時未搵到合適新數，要搵地方暫住就好麻煩。

收緊樓按的確十分困擾用家，700萬以上的樓只可以借4成，1000萬只可借五成，此招顯然是針對換樓客，以市區樓一萬蚊一尺的市價來計，多出的一成正正是一百萬，務求叫你班中產全部唔好郁。不過香港業主是最逆來順受的一群，負資產又忍，忍得過負資產，想享受吓辛苦的成果，又被人眼紅到日日嘈，搞到政府連換樓呢條路都封埋班中產。

政府加大小型單位供應量，朋友又擔心，將來500-700呎的單位會否供應過多，搞到佢要換上一千呎更加難？佢又擔心得又道理，政府只懂討好班嘈得最大聲的政客，交稅交到喊的中產反而被佢地開刀，未來800-1000呎中層家庭的居所將會供不應求，地產商手頭上如果不是限呎地，一定儘起豪宅，一個四口加埋菲傭，想住三房單位絕對唔過份，但合理的市區選擇其實不多，政府增加小單位供應根本是看錯市。

不少人認為政府不得民心，是因為佢堵截了市民向上流動的機會，推限尺樓、收緊按揭、榨乾流通量，正正是阻截中產改善生活，咁點解未有樓都可以改善生活，有樓交完釐印費，每季交差餉，反而要被政府開刀先？

其實我地呢班中產股樓賺錢輸錢都甘心，但要在公平市場上輸贏，因為政府扭曲市場，一心諗住犧牲小業主，換取時間，等限尺樓、居屋、公屋慢慢兌現，要一班業主跟住佢扭曲的政策氹氹轉，就真係一百個唔甘心。