治癒劇首選

世局紛亂，不想扮晒世人皆醉我獨醒，逃避現實嚟講，最好就煲劇。
遲人N步，剛剛看完最後一輯Downton Abbey，總括來講，此乃一套非常治癒嘅家庭劇。Downton Abbey嘅結構十分TVB，完全係「季節 cross over真情」，不過製作認真得多，華衣美景，英式鄉紳， British accent，啱晒香港人。「季節 + 真情」嘅格局就係一個大家族，全部都食屋企 (即係劉丹間三多叉燒)，三代同堂，無厘頭多食飯戲，一定有個嫲嫲，個嫲嫲又一定霸道同句句有骨，個老竇一定係息事寧人，無咩性格嘅和稀泥，阿媽(善姨)又一定知書識禮，宅心仁厚。
Downton Abbey 講嘅係英國鄉紳故事，莊主Lord Grantham 世襲爵位，坐擁封地，所以咩都唔使做就有錢收，呢點同香港鄉紳相似，不過香港係仆街賤格版。由於 Lord Grantham全家都唔使做嘢，所有場景都係莊園內發生，唔止一齊食晚餐，早餐同lunch 都係大廳解決，造就大量食飯場面，好多衝突都係飯桌上發生。呢個setting 對於睇TVB 劇長大嘅觀眾來講，真係非常親切同熟悉！
我睇另大套美劇House of Cards之時，最大感受就係全劇冇個好人，全個政壇都係賤人！ Downton Abbey啱啱相反，嚴格來講，全劇冇壞人，起碼冇人係大奸大惡，最多只係是非精。男僕Mr Barrow 同Lady Mary嘅性格，可以歸納為「睇人仆街最開心！」雖然處身社會上南轅北轍嘅位置，但二人有同樣嘅性格缺憾，Lady Mary根本係「真情」嘅馬蹄露，「最鍾意就係買嘢同睇唔起人！」每一個人，由佢自己細妹Lady Edith，去到第一、二任老公，都曾經俾佢睇唔起，同Mr Barrow 一樣，佢唔抵得人地活得比佢好，而劇集嘅高潮，有時就來自佢地點樣篤爆人地，跟住「睇人仆街！」Lady Mary係上等人，所以雖然心地唔好，但仍然受萬人膜拜，相反男僕Mr Barrow就受人排斥。不過講得係治癒劇，二人最後當然都搵到心之所安啦。
劇集分上等人及下人兩條軌跡，上等人之中，我最鍾意嫲嫲，即係Lord Grantham老母，演員係英國老戲骨，在「哈利波特」中演其中一位教授嘅Maggie Smith (以下簡稱哈利婆婆)。哈利婆婆抵死之處，在於其實佢明白所謂上等人，咩都唔使做就嘆世界，又有工人使，其實唔多合理，所以佢霸道之餘，有時會出其不意地妥協，當Lady Mary太勢利時，佢又會叫佢積番D口德，總之哈利婆婆嘅出現，在於「估佢唔到」。佢最懷念一次大戰前，大家都唔諗嘢，覺得貴族有封地係理所當然嘅事，正因為佢心知自己其實乜7都唔識，純粹條命生得好，所以佢會識時收歛。
二小姐Lady Edith嘅角色設計係一條溝唔到仔嘅可憐虫，因為成個貴族圈子"溝呀ble" 嘅仔，都被Lady Mary 溝晒！Matthew Crawley寧願俾Lady Mary睇唔起，都唔受佢溝，而在第一次世界大戰前，貴族女人除咗搵人嫁之外，真係冇咩好做，未嫁重唔可以唔化妝就食早餐，公道咩？所以 Lady Edith 六個episodes 都係亂咁搵仔溝，由鰥夫公爵，到普通村民，再到打工仔，全部唔放過，由於太desperate，所以成日被Lady Mary 恥笑，重生咗個私生女，不過又係嗰句，講得治癒， Lady Edith當然修成正果，亂溝咗個打工仔，竟然變咗莊園繼承人，個莊園重要大過Downton Abbey， 真係amazing。亂溝仔之餘，Lady Edith亦算勇敢，佢成日都想搵D 世藝，人生唔好過得咁無聊，咁啱佢其中一條仔，死咗之後留低間雜誌社俾佢，佢就慢慢學識做一個時代女性啦。
Downton Abbey時代設定於20世紀初，WWI同西班牙流感 都死得人多，所以六輯劇集，每集都有人瓜老襯。當中三妹Lady Sybil難產，死得最早。佢老公Branson為咗配合劇情，一直冇得續弦，之後個角色就係擔當Mary & Edith之間嘅和事老，兼夾幫Lord Grantham打理莊園，好地地一個激進年青人， 就咁就被建制吸收咗，so sad。
貼身男女僕乃兵家必爭之位，因為工人平日無咩機會同事頭講嘢，男女僕服侍主人就寢，乃講是非最佳時間。工人群之中，我最唔鍾意Lord Grantham 個貼身男僕Bates同佢老婆Anna，Mr Barrow唔鍾意Bates 係有原因嘅，條友又有案底，又有少少不良於行，咁都做到老爺男僕，公道咩？同埋佢兩公婆輪流被人告謀殺，十分搵戲嚟做，佢兩個D台詞又特別膠，睇得人好不爽。
另外一個煩膠角色就係管家Carlson，狐假虎威，老爺小姐講一句，佢就奉為聖旨，老爺未話有問題，佢就逼不及待阻住晒，真係好奴才。結局佢被逼退休， Mr Barrow坐正。睇人仆街最開心都可以收成正果，係咪好治癒呢？